Inicio > Encamientos > Estíbaliz encamienta: picadillu con quesu d’El Buen Yantar
EncamientosGastronomía

Estíbaliz encamienta: picadillu con quesu d’El Buen Yantar

Les llamaes “tapines de barra” son una escelente opción tanto pa prebar estremaes ellaboraciones como pal nuesu bolsu.

LA SIDRA.- Dexemos atrás yá’l branu -bono, eso dicen porque branu, branu… tampoco nun lu sentimos demasiao-, y agora yá llega un pelín de fresco- Esta dómina a min encánciame, n’especial proque soi mui mui fan de dos coses: en primer llugar, de los caldos de pita o mariscu qu’escomiencen yá a poner nos chigres, y en segundu, porque los cocineeros pónense manes a la obra pa tresnar los meyores… ¡guisos de cuyar!! Mio pa suel dicir: nel sur fríese, nel cientru ásase y nel norte guísase. ¡Y n’Asturies vaya cómo!

Pero claro, sobra dicir que por mor de lo contundente d’estos platos, fai que seya difícile poder prebar varies ellaboraciones d’una mesma tacada. Anque bono, eso enantes, porque agora tamos viendo que ca vegada más puen pidise “tapines de barra” por un módicu preciu pa que podamos pidir dos o trés si vamos a un chigre en compaña de la nuesa xente. Y claro, como nun pue ser d’otra miente, la mayoría van acompangaes d’una botellina sidre. Pa que too salga reondo oi.

Pos güei voi encamenta-yos una d’estes “tapines de barra” que tanto al mozu como a mín mos encancia, y esa ye… el picadillu con quesu d’El Buen Yantar (Casimiro Velasco, 11, Xixón). Pufff, yá se que nun hai que pasase con estes coses, pero un díi ye un díi y tovía nun me pongo a camentar na operación bikini 2018. La tapina ye abondo curiosa, el picadillu ta perbien de saborgu y, too hai que decilo, nun repite. Asina mesmo ta perfechamente llograda la integración del quesu azul y les pataques, que, como siempres equí, trésnenles como en casa. El preciu ye de 5 € más la ración de pan que cuesta 1, y créyeime, el pan utilízase porque ye imposible non moyalu na salsina que va quedando na cazolina.

Y nun pueo colar ensin encmaentar otra d’estes tapines, esta yá más “light”. Los muxones a la vinagreta tan bonísimos. Paco, el propietariu, siempres ta al tantu de tener bon mariscu, y curia ca detalle, dende’l bugre, fasta, como nesti casu, el muxón. Los de la tapina tan gordinos, nel so puntu -nin pasaos, nin cruos-, y la vinagreta ye mui suavina pero saborgosa. Amás esti chigre encánciame por como ta decoráu, ye d’ambiente rústicu, coles paredes a piedra visto y col tan acoyeor ambiente de los chigres d’antañu, anque eso sí, los sos veceros son de toles edaes.

Dexa una rempuesta

La so direición d'email nun sedrá espublizada Campos obligatorios marcaos con *