El llagar d’El Duque corchó esti productu algamáu del postrer corte del llagar, que sosprendió tanto que yá foi mercáu na so totalidá por chigres de Villaviciosa y Xixón
LA SIDRA.- Estrucipié ye’l postrer corte del llagar, el mostiu que sal nel prensáu caberu de la llagarada. Un productu que nun se suel poner a formientar en solitariu, yá qu’l se desfecha o utilízase pa mecer con mostios estrayíos previamente. Pero Pedro Baldó, del llagar El Duque decidió esperimentar. Punxo’l mostiu a formientar nun tonel aparte… ¿Y el resultáu? ¡Tou un ésitu!
El llagareru rellata como llegaron a algamar esti productu: “nós cuntamos con dos llagares hidráulicos cónicos que saquen el mostiu en 24 hores. El llagar córtase ca tres hores. De magar d’eses 24 hores la magaya de la mazana ta perestrumío, queda compacto y con pocu mostiu. Esti postrer xugu, enantes de retira la magaya, fuimos chándolu nun tonel pa nun mecelo, yá que teníemos otru mostiu que mos abultaba meyor. Esi tanque rellenóse pero quedó separtáu. Y como a los ocho o nueve meses prebámoslu. Sosprendiomos muncho porque nun cuntábemos que la sidre toviere tan bona”.
“De lo bono poco” reza’l dichu popular. De tala miente qu’El Duque namás corchó 4.000 botelles. Toes yá mercaes por estremaos establecimientos. ¿Y ónde podemos atopar esti productu? Nes sidreríes Bedriñana y La Capilla en Villaviciosa. En Xixón en La Serena y en La Nueva Ibérica. Lo mesmo qu’al llagareru Pedro Baldó, la sidre sosprendió a especialistes del seutor y tastiaores qu’asistieron ayeri a la presentación d’esti productu nel llagar d’El Duque.
¡Norabona Pedro! La sidre natural y les sos formes de comercialización siguen abriéndose camín.
