El prósimu 3 de setiembre, cola collaboración de los llagares maliayos
LA SIDRA.- Los once llagares maliayos van participar nesta edición, que se va cellebrar el sábadu 3 de setiembre, de magar les 12.00, na plaza del Conceyu y demientres la que’l Grupu Astur de Colleicionismu Sidreru va apurrir “La Etiqueta más guapina 2022”.
Villaviciosa ye sinónimu de sidre. Dempués de dos años, torna la Fiesta de la Sidre en tola so rellumanza, recuperando la so sencia, la degustación de sidre qu’atrayía a mamplén de presones ca añu a la plaza del Conceyu, conocía popularmente como plaza del Güevu, y que, nesta XXIII edición, que se va celebrar el sábadu 3 de setiembre dende les 12.00 hores, tornará cimblar culete a culete.
Los once llagares maliayos –Buznego, Castañón, Coru, Cortina, El Gobernador, Frutos, J. Tomás, Los Gemelo, M. Busto, M. Vigón y Vallina– van tar presentes nesta edición, dando a tastiar la so sidre.
Amás, el Grupu Astur de Colleicionismu Sidreru, va apurrir “La etiqueta más guapina 2022”, que busca reconocer la calidá nel diseñu de les etiquetes de sidre, pola que se ta apostando cada vez más nestos postreros años.
