Llevóse a cabu nel Llagar de Foncueva y tamién tuvieron Trabanco, Peñón y Muñiz, los cuatro formen parte de la marca de calidá.
LA SIDRA.- El díI d’ayeri tuvo llugar la primer de les Xornaes de Formación Sidre d’Escoyeta. Un cursu al que tuvieron convidaos el Colexu de Críticos, medios de comunicación y blogueros. Ente los dos últimos: -Les Fartures, Empáchate, Lloca pola sidra, la sidae ta de moda, Omacatladas, Fartúcate, Non te quedes ensin comelo nin bebelo, TPA, Gastroastur, The Wandering S y la revista LA SIDRA. L’oxetivu de la xornada foi dar a conocer en fondura la citada marca de garantía, qué procesos se desendolquen, qué diferencies presenta frente a la sidre natural convencional, quién formen parte d’esti proyeutu y qué papel desempeña caún de los profesionales qu’apurren el so saber faer a la Sidre d’Escoyeta.
El llugar nel que se realizó foi nel Llagar de Foncueva, en Sariegu y escomenzó a les siete la tardi. El primeru n’ufiertar la so ponencia foi Jorge García, direutor téunicu de produición vexetal de Campoastur. Elli faló de les races de mazana esistentes n’Asturies y les que s’utilicen pa ellaborar esta marca de calidá; tamién de les pruebes de maduror, el métodu de pañáu y los tiempos de mayáu. Los siguientes n’esponer fueron los ellaboradores de la marca: José Manuel Riestra de Sidra Muñiz, Samuel Trabanco de Sidra Trabanco, Cele Foncueva de Sidra Foncueva y Juan Manuel Golnzález de Sidra Peñón. Darréu, Roberto Menéndez, auditor xefe de Bureau Veritas espunxo cómo se realiza la certificación de la sidre d’escoyeta.
La postrera de les ponencies teóriques corrió al cargu de Lluis Nel Estrada quien dio unos curtios apuntes sobro l’oficiu del echaor y el so futuru; amás d’anunciar que se ta llevando a cabu un proyeutu pa la reconocencia profesional de los echaores, siendo elli la persona responsable. Dempués, Sabino Pérez, mayestru echaor, ensiñó a los asistentes los conceutos básicos de mano a echar y Maximino Villarica, presidente de la Mesa de Tastia de Sidre d’Escoyeta, demostró, con unos culinos de la sidre nuevo de Foncueva y con otros de sidre yá trasegao, cómo se realiza una degustación de la nuesa bébora tradicional. Pa rematar, espicha nel llagar y sidre… sidre d’escoyeta.
