Semeya: El Muséu del Pueblu d’Asturies demientres la Primer Sidre l’Añu
El conceyu presentó la ufierta de la ciudá énte más de 70 axencies del territoriu español na que destaca’l papel de la cultura sidrera asturiana
LA SIDRA.- Xixón Turismu patrocinó l’asamblea añal d’Axencies d’Eventos Españoles Asociaes, que se cellebró la selmana pasada vía streaming. Esti patrociniu forma parte de la estratexa de la ciudá p’atrayer xuntes, congresos y eventos, una vegada superaes les restricciones de la pandemia. Amás, Xixón Turismu va llevar a cabu una invitación a les axencies miembru pa poder conocer la ciudá en visites de prospección.
“Pesia la situación que tien el sector MICE, con un futuru a curtiu plazu complicáu, ye importante siguir trabayando pola promoción al llargu plazu. El contautu coles axencies d’eventos, que tán pasando una situación difícil, permite preparar pa los nuevos enclinos n’eventos a les que va haber que dar respuesta cuandu’l seutor se reactive con una competencia más fuerte de la esistente fasta agora”, desplica Daniel Martínez Junquera, direutor de Xixón Turismu.
Asina, púnxosede manifiestu ente los asistentes que la ciudá cunta con espacios sorprendentes, como l’Acuariu, el Muséu del Pueblu d’Asturies o Llaboral Ciudá de la Cultura, declarada como ún de los meyores espacios pa eventos del territoriu español. Tamién destacaron la posibilidá que tienen los entamaores d’eventos de realizar una espicha o actividaes alrodiu la cultura sidrera asturiana; o la ufierta d’espacios al aire llibre y xunta’l Cantábricu.
