Cellébrase’l prósimu sábadu 3 de setiembre y repartiránse más de 8.000 llitros.
LA SIDRA.- La edición númberu XIX de la Fiesta de la Sidre de Villaviciosa tendrá llugar el prósimu sábadu. Nella participarán 11 llagares del conceyu: Buznego, Castañón, Coro, Cortina, El Gobernador, El Traviesu, Los Gemelos, M. Busto, Vallina y Vigón. La organización camienta que se repartirán unos 2.000 vasos y que s’echarán más de 8.000 llitros de sidre. L’artista asturianu Rodrigo Cuevas, imaxe de la DOP Sidre d’Asturies, sedrá l’encargáu de la naguración del festival.
La fiesta entamará al meudíi, y a la una fadráse entrega de la “Etiqueta más guapina” otorgada pol Grupu Astur de Colleicionismu Sidreru. A les seyes de la tardi escomenzará el XXIX Concursu d’Echaores y a les ocho, el Cuartetu Torner amenizará l’eventu.
Amás, demientres tol díi, habrá actividaes del XI Festival Internacional de Gaita nel parque del Pelambre y tamién se rializarán les xornaes gastronómiques les Tables Gaiteres.
El públicu qu’asista podrá prebar tola sidre que quiera namás con mercar el vasu -3 euros-. Los asistentes podrán votar pola sidre que más-yos preste, y d’ende saldrá’l premiu’l públicu a la meyor sidre. Habrá qu’esperar a les Fiestes del Portal pa saber qué sidre ye la sidre ganadora del Concursu de Sidre de Villaviciosa, yá que sedrá nesa festividá cuando s’escueya a la trunfadora.
