La tradicional cai uvieina de la sidre preparó un especial navidiegu pa esti xueves.
LA SIDRA.- Güei tresnóse en “Gascona, Bulevar de la Sidre” un especial navidiegu de cancios de chigre que va escomenzar a les ocho y media la nuechi. El grupu tradicional Fitoria va llevar a cabu l’actuación acompangáu de la Bandina Los Gascones, que van faer un percorríu poles sidreríes que componen la tradicional cai uvieina. Los Gascones van dir afatiaos col traxe’l páis, pidiráse l’aguilandu y entonaránsese villancicos al son de la música.
Esti espectáculu forma parte de la quinta amuesa “Cancios de chigre na Gascona” que se va llevar a cabu fasta’l prósimu abril. “Ca xueves, El Bulevar de la Sidre dexa cantar y pasalo bien a tol que deseye” indiquen dende la citada entidá. Gascona ye la cai sidrera por escelencia n’Uviéu y l’asociación ta compuesta por 13 chigres que, xunciendo los sos esfuerzos a lo llargo de tol añu, rialicen distintes actividaes por que los sos veceros y visitantes esfruten siempres d’acordies cola tradición y cultura de la sidre y de los productos gastronómicos asturianos.
Amás, Gascona sigue somorguiada nel proyeutu d’unificación de terraces pa que cumplan colos requisitos desixíos na nueva ordenanza municipal. Hai de recordar que la normativa diba entrar a valir el 1 de xineru de 2017, sicasí, aprebóse una moratoria d’ocho meses, de tala miente que les nueves terraces van tener que tar llistes enantes del 30 de setiembre.
