Esta bébora, ellaborada con mostiu de mazana de sidre y miel, salió al mercáu demientres el branu.
“Valnera ye una sidre de miel que a la que coloquialmente conózse-y como ‘vinu mazana’. Ye una bébora lleldada, de fácil toma, idegal como aperitivu o postre”. Asina describe Antonio Torres, ellaborador d’esti productu y al mandu de la finca La Rionda en Tornón, en Villaviciosa el so productu. Esta bébora minimiza l’ácidu volátil de la sidre tradicional, colo que se llogra una bébora fresco, arriondada, equillibarada en cuanto a acidez y a dulzor. “Nun ye ná dulzapaya” siñala Antonio y amiesta: “en ñariz ye bien arumosa, y tien ciertos toques a frutos del monte y a almendra”. Hai de destacar qu’esta bébora ye cien per cien natural y que nun lleva aditivos.
Demientres nueve años Antonio Torres tuvo esperimentando con diversos ellementos na so finca pa, dempués de munches prebes, llanzar al mercáu Valnera. Les primeres botelles vendiérense n’abril, y demientres estos meses la produición foi abondo bien. “Sentímosmos arguyosos, la xente que lo prebó, gustó-y” afirma.
La finca La Rionda fundóse en 1930 como esplotación llechera. Debíu al cese de l’actividá, llantó una pumarada de mazana de sidre diseñada y planiada en 1997 p’abastecer la demanda de la DOP Sidre d’Asturies, a la que ta adscrita. Amás de los productos qu’ellaboren, tamién realicen visites guiaes y actividaes como “entama la to propia espicha”. Amás de Valnera tamién producen vinagres de sidre a la castaña, a la herbabona, al romeru, a la mazanilla o balsámicu de mazana.
