Más de milenta llitros de sidre provinientes d’once llagares industriales y dalgún caseru de la fastera.
LA SIDRA.- El pasáu domingu cellebróse una nueva edición de “Valdesoto cola Sidre”, una degustación entamada pol colleutivu “Toos Xuntos Podemos”, que cunta cola collaboración del Ayuntamientu Siero.
El sistema foi l’avezáu de mercar un vasu xerigrafiáu por 3 € que da drechu a prebar tola sidre que mos pete, lo que supunxo que de les 12 a les 3 de la tardi se diere acabu a más de milenta llitros de sidre nun estupendu ambiente mui familiar y con muncha mocedá, que se vió favorecíu pela bona climatoloxía.
El dineru recaldáu cola venta vasos sedrá destináu a sufragar los gasos que xenere tornar a presentar la candidatura de Valdesoto a “Pueblu exemplar d’Asturies”, y la recaldación del puestu pinchos foi pa l’asociación “El Cencerru”.
Pasu ente pasu, y pesia tar mui escasamente publicitáu, esti eventu sidreru va afitándose nel contestu sidreru y folixeru asturianu, de tala miente que son muches les presones que participen nelli, y que lu tienen incluyíu nel “pelegrinar” asturianu de la sidre.
