La marca acoyía a la Denominación d’Orixe, ellaborada en llagar Castañón en Quintueles, gana’l XXXVI Concursu de la Meyor Sidre Natural d’Asturies cellebráu en Villaviciosa
LA SIDRA.- “Lo importante nun ye llegar, sinón caltenese” siñala un reflán y vaya que Val de Boides fai honor a elli. Esta marca, acoyía a la Denominación d’Orixe Protexida, ganó’l XXXVI Concursu de la Meyor Sidre Natural de Asturies celebráu en Villaviciosa, un de los más prestixosos d’esta tierra. Pero amás, recordamos, esta mesma sidre tamién foi la vencedora del pasáu Salón DOP y aparte llogró la plata nel Festival de la Sidre de Nava. Tou un trunfu dientru’l seutor sidreru asturianu, y qu’amás refrenda l’apueste pola calidá de Julián Castañón, propietariu del llagar maliayu.
El Concursu de la Meyor Sidre Natural de Asturies cellebróse’l llunes 14 de setiembre na Plaza’l Güevu, siguiendo toles midíes de seguranza prescrites pa torgar l’andanciu por coronavirus.
Nesta ocasión el xuráu tuvo compuestu por Víctor Fernández de la Sidrería El Chaflán de Xixón, Agustín Rodríguez de Sidrería La Ballera de Villaviciosa, el tastiador maliayu Mino Villarrica, Luis Naredo de Sidrería El Furacu, tamién, de Villaviciosa; y Sindo Martínez tastiador de Nava. L’encargáu d’echar la sidra foi, como n’otros años, Chema Pezón.
