El Llagar Castañón impúnxose a les 42 sidres presentaes nel Concursu de Sidre Natural de Villaviciosa, en xunetu ganó en Nava
LA SIDRA.- Fueron 86 los puntos qu’algamó la sidre DOP Val de Boides que-y dieron la victoria nel Concursu de sidre Natural en Villaviciosa. Ochos y nueves algamó na primer tanda llogrando 42; y na segunda ronda, los xueces otorgáron-y -amás de los yá citaos ochos y nueves-, un diez. Eso bastó-y pa superar a les otres seyes sidres que pasaren a la final. Hebio un empate ente trés de les concursantes a 83 puntos, y les demás quedaron per baxo d’esa nota. El nivel foi perasemeyáu, la calidá increméntase añu ente añu. El xuráu tuvo compuestu pol presidente del tribunal Maximino Villarrica, Víctor Fernández, Luis Naredo, Agustín Rodríguez y Gumersido Martínez.
Con esti premiu al Llagar Castañón non solo se posiciona nun nivel altu en cuantu a calidá de sidre se refier, tamién demuestra que quien apuesta por caltener una costante d’estabilidá na nuesa bébora tradicional… tien la so recompensa. El llagareru Julián Castañón manifestaba dempués de recibir la reconocencia, que: “aparte de los premios como ésti, comu l’anterior de Nava -que tamién algamemos l’añu pasáu-, o los dos años seguíos que mos reconocieron como meyor sidre natural na Denominación D’orixe Protexío… facemos por continuar cola mesma llinia. Creo que sabemos facelo bien independientemente de que ganemos o non, yá qu’hai sidre perbono que tan equí y que puen ganar perfechamente. Pero agora llevamos una bona racha y hai qu’aprofitala”.
Esti concursu enártase dientru les populares Fiestes del Portal en Villaviciosa que continúen fasta’l 12 setiembre. “Munchos califiquen esti concursu como “La Chapions de la sidre”. Y yo creo que tan no cierto. Villaviciosa ye ún de los concursos más antiguos de la sidre n’Asturies y los más de los llagares d’Asturies quien venir equí a competir. Güei demuéstrase nesta plaza l’Ayuntamientu, l’espaciu permite que’l certame se rialice de manera abierto y amás con una pantalla xixante onde la xente pue siguir el concursu, la tastia y les puntuaciones” siñaló l’alcalde de la villa, Alejandro Vega.
