El prósimu díi 2 de xunetu, a les 20.00 hores na Casar Conceyu de Pimiangu cellebraráse la V XORNADA DE LA SIDRE. Convirtiendo d’esta forma a Pimiangu nel llugar sidreru más oriental d’Asturies
LA SIDRA.- La presentación de la Xornada va correr a cargu del antropólogu Xuan de Con, que va disertar sobro la cultura sidrera contemplando dende’l díi ente díi de la mazana fasta l’echáu, cumpliendo asina con ún de los oxetivos de la Xornada que ye ameyorar la conocencia del procesu y de la cultura sidrera.
De siguío, va realizase’l tradicional hermanamientu sidreru con pueblos de carauterístiques asemeyaes a Pimiangu, nesta ocasión l’hermanamientu va ser con Hénanbihen de Bretaña, Estelle Roullier va comentar les semeyances y diferencies de les nueses sidres. Preténdese d’esta miente cohesionar dos pueblos d’asemeyaes carauterístiques y tradición na ellaboración de sidre artesano.
L’actu principal costitúilu’l concursu de Sidre Casero onde’l xuráu va rializar la valoración, y determinar el ganaor de Ribadeva. La novedá d’esti añu ye que’l xuráu, non solo va puntuar, sinón que va rializar públicamente una valoración que sirva de retroalimentación a los ellaboradores. El presidente del xuráu va ser Miguel Angel Pereda, escritor ya investigador de la sidre casero y va representar al Club Sierense d’Amigos de la Mazana, ente’l so cometíu ta comentar los criterios de valoración de la sidre casero, va tar acompangáu por Vicente Ardura de l’Asociación de Llagareros Artesanos del Caudal, y Avelino Fuentes de l’Asociación de Sidra Casero de Piloña
Complementando al concursu y dando una dimensión especifica a la mazana, va facese tamién un concursu de postres de mazana onde los asistentes al eventu van poder tastiar y valorar.
Amás de la sidre de Bretaña, tamién podrá tastiase una amuesa de la sidre producío nos llagares mas importantes del oriente d’Asturies: Valleoscuru de Tresgrandas, Cabañon de Nava, el Cuchareru de Nueva y Pamirandi d’Asiegu
L’eventu va rematar con una espicha tradicional, onde los productores y amigos d’esta bébora van esfrutar d’una degustación de la producción llocal.
Tola xornada va tar amenizada pola bandina la Garrapiella, con un ampliu repertoriu de cantares asturianos, remembrando los “cancios” de chigre.
