La Sidrería- Parrilla Muñó, gallardonada col Premiu d’Acesibilidá 2017.
LA SIDRA.- La Parrilla Muñó, abierta en 1982 nel barriu’l Coto, convertióse coles sos aclamaes costielles, carnes y pexes al caricote, ellaboraos en parrilla de lleña, nun referente na restauración xixonesa.
Demientres estos 25 años, fueron ameyorando y ampliando la so ufierta gastronómica, na que s’inclúin platos pa presones vexetarianes o con necesidaes alimenticies especiales. Y en custión de sidre ufierten la ellaborada nos sos propios llagares con mazana asturiana d’escoyeta.
Fai 4 años decidieron abrir, con gran ésitu, una nueva sidrería- parrilla, esta vegada nel barriu Morea, al pie de la sablera de Poniente. Y foi ésti’l llocal distinguíu apocayá col Premiu “Empresa Xixón Turismu Acesible 2017”, yá que cunta con istalaciones preparaes p’acoyer a presones con movilidá amenorgada y necesidaes especiales.
Estos gallardones, otorgaos pola Asociación de Mancaos Medulares y Grandes Discapacitaos Físicos (Aspaym Asturies), tienen como oxetu identificar y espublizar iniciatives que faciliten la vida y los desplazamientos de presones con cualisquier tipu de discapacidá, ya convertilos n’una ferramienta de concenxación social.
El premiu concedíu a la Sidrería- Parrilla Muñó encuádrase dientru la categoría d’acesibilidá urbanística y arquiteutónica d’iniciativa privada.
En pallabres d’Inés Meana, xerente del establecimientu, el so compromisu cola acesibilidá básase en que los veceros siéntanse a gustu y puedan esfrutar de les sos istalaciones, con pasiellos anchos y aseos afayaos pa presones discapacitaes o con movilidá amenorgada.
