Luis López fo’l ganaor del viaxe a Bristol de Sidra Trabanco
LA SIDRA.- La esperiencia “Destín Sidreru” repitió ésitu na so segunda edición, cola participación d’alrodiu de 50.000 persones que consumieron una botella de Sidra Trabanco nes postreres seyes selmanes, que son les que duró la promoción. El ganaor según el sortéu realizáu na notaría de José Luis Rodríguez García-Robés foi Luis López Palacios, que va dir de viaxe a Bristol convidáu pol llagar pa que conoza otres zones sidreres del mundiu. L’añu pasáu’l destín foi Frankfurt y resultó una esperiencia fascinante pa la ganaora, Liliana Pasi.
Na iniciativa “Destín Sidreru” participaron más de 800 sidreríes d’Asturies, con un índiz de respuesta fantásticu per parte de los aficionaos a la sidra, yá que nestos díis rexistráronse 49974 códigos de botelles introducíos na ueb, una cifra asemeyada en proporción a la del añu pasáu, yá q’anque fueron más los códigos de la edición 2016 l’actividá duró dos selmanes más.
Bristol güel a mar y a sidre. Paezse a Xixón en munches coses. Cuenta con un puertu de notable relevancia, lo qu’apurrió un calter bien concretu a los sos habitantes, arteros negociadores y xente cosmopolita.
Un aspeutu importante de Destín Sidreru” ye que los aficionaos a la sidre tienen la opción de deprender más sobro esti mundu tan nuesu y asistir si la suerte los acompaña a les Master Class que ca vienres faiense nel llagar, onde se visitaben les istalaciones, desplicábase’l procesu d’ellaboración, les distintes tipoloxíes de sidres y tastiaben en primicia dende la Sidre sobro la Madre, que saldrá’l prósimu 15 de mayu, fasta Avalon o Poma Áurea. Inclusive col enfotu de formar a los consumidores amosábense sidres con defeutos pa que los aficionaos puedan estremales y refugales en casu d’atopales nun establecimientu.
A lo llargo d’estes selmanes Sidra Trabanco tamién convidó a los sos veceros a esfrutar de cenes en sidreríes de tol país, siendo los postreros afortunaos Javier Sánchez, de La Felguera, Mar Marina Ruesga, de Xixón, Raúl Prado, d’Uviéu, y Mónica García, d’Avilés.
Dende’l llagar, Isabel Trabanco, afirma que “ye una de les esperiencies más gratificantes que tenemos como ellaboradores, ver que la xente vien a la to casa con illusión, ganes de deprender y d’esfrutar de la sidra, que ye daqué nueso, ta nel nuesu ADN, y que debemos inculcar a les nueves xeneraciones”.
Dende Sidra Trabanco garanticen yá que el prósimu añu tornará haber un Destín Sidreru”. ¿Va Ser Michigan, n’Estaos Xuníos? ¿Va Ser la Bretaña francesa? Lo importante ye qu’esti tipu d’actividaes promocionen la sidre, la so cultura y amplíenmos la visión que tenemos d’un productu d’equí pero que tamién se consume n’otros munchos llugares del mundiu.
En poques selmanes va llegar la esperada Sidre sobro la madre, ensin trasegar, la primera del añu pal llagar de Llavandera, que vien “prestosa, ta fantástica” según indica Samuel Trabanco.
