“Mazana con Coco, la meyor sidre” foi’l nome del disfraz ganaor n’Avilés.
LA SIDRA.- Nestos díis d’Antroxu nun podíemos dexar de llau a los nuesos amigos de cuatro pates.
Asina, pesia’l mal tiempu, na cellebración de les Mascotes Antroxaes desfilaron pola pasarela los diez perros participantes nel segundu concursu cellebráu n’Avilés.
Nesta ocasión, el vencedor foi Cocu, un chihuahua negru afatiáu con una montera picona, una mazana collorada y una muñeca vistía d’asturiana.
Acompangábalu la so dueña, la xixonesa Rolinda Peláez, amarutada de botella sidre, quien amosábase bien contenta por consiguí’l primer premiu, dotáu con 125 euros, y alcordábase que yá quedaren terceros na primer edición del concursu.
En segundu llugar clasificóse Sheldon, un llabraor amarutáu de lleón; y en tercer y cuartu puestu, dos yorkshire: Lúa nel so DeLorean de “Regresu al Futuru” y Kira, amarutada de xugador de rugby.
