Tino “el Roxu”, remembra’l so pasu pola Expo’92.
LA SIDRA.- Esti añu cúmplense 25 años de la Esposición Universal de Sevilla, bautizada como “La Era de los Descubrimientos”.
Naquel añu, Asturies presentó un pabellón colo más representativo de la cultura asturiana, dende’l so collor verde a osos móviles que xubíen y baxaben poles colunes llaterales y una amplia esposición de semeyes.
Y qué tanto, ellí nun podía faltar una sidrería con Florentino Mañana (Tino “el Roxu”), l’echaor de sidre más famosu de tolos tiempos, al frente.
Los sos echaos de sidre convirtiéronse en toa una atración pa los visitantes, llegando a xubise a la barra con ocho vasos: cinco na so man y brazu, ún en ca pie y otru nun cayáu suxetáu cola boca.
Dende les 11 fasta les 2 de la mañana, la sidrería taba enllena, con Pedro Morán (Casa Gerardo) y Ramón González (El Máquina) al mandu la cocina, la xestión y el suministru del recintu, que cuntaba con un lluxosu restorán na planta 0.
Demientres seis meses, acaldía vendíense ente diez y dolce potes de fabada, 300 raciones d’arroz con llechi y fasta 126 caxes de sidre p’atender a los trés millones de presones que visitaron el pabellón.
A pesar del altu preciu tanto de la sidre como de los platos, la competencia yera más cara y nun ufiertaba l’espetáculu d’echáu del “Roxu”.
Munchos famosos allegaron a la cita asturiana, dende un xoven Príncipe d’Asturies de 24 años, güei convertíu en Rei d’España, fasta la cantante Massiel, el presentaor Carrascal o’l ciclista Pedro Delgado.
Tres les llargues xornaes de trabayu, Tino xubía fasta l’azotea del edificiu, dende onde contemplaba l’espectáculu de lluz y soníu del llagu, la plaza d’América, la esfera bioclimática, el Palenque, los retruques de los tresbordadores espaciales, la Cartuxa y les Carabeles del Descubrimientu.
Güei, a los sos 68 años, Tino “el Roxu” esfruta de la so xubilación, cola so partía de bolos diaria y bebiendo sidre a la hora de la xinta y la cena.
