Con 87 llagares participantes, y una impresionante rempuesta popular, Javier Canteli ganó’l certame, nel qu’hebio un recuerdu pa Xabi Solares, Ernesto Seijas y Germán Alonso, tres vecinos siempres collaboraores na organización del concursu
LA SIDRA.- De los 87 llagareros participantes llegaron 12 a la final, que resultó bien reñía, con un triple empate del qu’al final salió trunfador Javier Canteli, de La Piquera, Fuentes; seguíu de Tomasita Fernández, de La Riera, Pión y Adrián Berros, de Terní, Valdebárcena. Tamién hebio una distinción al ’Echaor más prestosu’, que nesti casu foi echaora: Lorena Díaz, de Villaviciosa.
Cola mítica Plaza’l Güevu atarraquitada de sidreros de tol país a la espera de prebar la sidre casero de Villaviciosa, la xornada foi un puru ésitu, onde polos 4 € que costaba’l vasu comemorativu del eventu, pudo prebase la sidre de ná menos que 87 llagares de sidre del conceyu maliayu.
Cuasique 2.000 llitros de sidre nunes poques hores, y el disgustu de munchos y munches sidreres énte la imposibilidá de prebar la sidre de tolos llagares presentaos; nun concursu de sidre casero cimeru nel país, tantu pola cantidá de llagareros presentaos como pola calidá de la sidre, un eventu entamáu pola Asociación de Fomento de la Sidra Tradicional Asturiana y la Casa Conceyu de Villaviciosa que va a más, y que ta sirviendo pa vindicar el papel de la sidre casero, da-y visibilidá y poner en valor tantu’l productu como’l productor, garantizando la so tresmisión y pervivencia nes nueves xeneraciones.
Javier Canteli, que repite trunfu nesta edición, dempués de la de 2012, sopelexó’l so arguyu por esti segundu trunfu, siñanaldo que “ye daqué percomplicao. Hai munchos participantes” desvelando’l secretu douna bona sidre casero “el formientu y l’ausencia de químicos”, considerando que la so sidre destaca pol “frescor y el pegue”.
Pa ochobre, tanto elli como Tomasita Fernández y Adrián Berros, tendrán la oportunidá de representar al conceyu maliayu nel Concursu de Sidre Casero d’Asturies, que se cellebrará pa ochobre, tamién en Villaviciosa.
