Apocayá más d’un mes que remató’l 14º Salón Internacional de les Sidres de Gala, y yá se tán dando pasos pa la presentacion internacional del SISGA’25
LA SIDRA.- Irlanda, Xapón, Italia, Francia, Chequia… el SISGA empecipió a tresnar la presentación internacional de la que va ser la so décimu quinta edición, y pa ello ta cuntando cola inestimable collaboración de los sos embaxaores, qu’acullá de lo que podríe paecer un entítulu honoríficu, asumen con enfotu les sos responsabilidaes.
Estes presentaciones realizaránse en llugares emblemáticos de les ciudaes anfitriones, y a les mesmes, amás de a los medios de comunicación convidaránse a los llagareros del país, enólogos y profesionales de la restauración, por que puedan conocer de primer mano la orixinal filosofía del eventu y los sos principales carauterístiques.
Nel intre de la presentación realízase una cata guiada de sidres que llograron la distinción ‘Premium’ nel SISGA’24 y, poques gracies, de los llagares anfitriones que participaron n’anteriores ediciones del eventu.
Trátase de presentaciones dinámiques y participatives, que permiten non solo dar a conocer el SISGA, sinón tamién establecer canales de comunicación ente los estremaos protagonistes del mundiu sidreru, al empar que se favorez un importante intercambiu d’información y de paeceres sobro la situación del mundiu la sidre nos estremaos países, y les perspeutives de desendolcu a curtiu y mediu plazu.
Coles mesmes, y dientru de lo que costitúi la sencia del SISGA, aprovéchense estes presentaciones p’afitar xuntes con representantes institucionales d’ámbitu llocal / rexonal, cola fin de da-yos a conocer la Rede Europea de Ciudaes de la Sidre y la Mazana, y valorar l’interés y les posibilidaes pa incorporase a esti interesen-te proyeutu que tien a la sidre y la mazana como nesu de xunión.
Pa recibir el PDF de la revista LA SIDRA fai falta tar dáu/da d’alta nel whatsapp de LA SIDRA
