1947, de Viuda de Angelón, Farmhouse de Ramborn Cider y Cydr Lodowy 2015 de Chyliczki, les meyores sidres del pasáu añu.
LA SIDRA.- Sigún la bloguera afincada en Berlín Cider Explorer, que tuvo analizando alrodiu de 200 sidres d’Europa, Canadá, Estaos Xuníos y Nueva Zelanda, Viuda de Angelón, Ramborn Cider y Chyliczki merecen tar ente les meyores sidres de 2017. Les trés fueron gallardonaes nel Salón Internacional de Sidres de Gala cellebráu en Xixón l’añu pasáu.
La sidre natural 1947, del llagar asturianu Viuda de Angelón, considérase una sidre equilibrao con un cielu la boca espeutacular y pelligrosamente bebible, yá que ye deliciosa n’estremu.
Farmhouse, de los luxemburgueses Ramborn Cider, defínese como la perfecha xunión de les notes de güisqui avieyáu en carbayu cola saborgosa mazana collorada, lo cual resulta nun increíble saborgu.
Cydr Lodowy 2015, del llagar polacu Chyliczki, descríbese como una sidre de xelu con una gran acidez que permedia’l so dulzayu de mazanes asaes y especies.
Amás d’estes sidres, Cider Explorer tamién escoyó la Sidra Brut Nature de Guzmán Riestra como una de les meyores sidres esplumoses pa cellebrar el Nuevu Añu. La sidre de Riestra foi definida como escepcional, enllena del saborgu refrescante de frutes cítriques y mazanes madures.
