El llagar xixonés trunfó nel XXXIII Concursu Asturiano de Sidre, cellebráu en Villaviciosa.
LA SIDRA.- Foron 95 puntos los que-y dieron a Trabanco’l trunfu nesti XXXIII Concursu Asturianu de Sidre, en Villaviciosa. A la final cellebrada ayeri a les siete la tardi, pasaren namás ocho botelles, de les que, como ye avezao nesti certame, nun se dió a conocer a qué ellaboraores pertenecíen. Na primer ronda la sidre Trabanco algamó una puntauación de 45 puntos. Los seyes xuraos valoráronla con nueve puntos caún.
Lo mesmo sucedió con otra sidre participante, la “numberu 5” qu’algamó esautamente la mesma puntuación, Pero na segunda ronda too quedó más que nidio. Los xueces otorgaron a la “sidre númberu 1” -la del llagar de Llavandera-, 10 puntos caún, colo que xubió al primier puestu del podiu. La que quedó en segundu llugar sumó 93.
El tribunal tuvo compuestu por Víctor Fernández, Agustín Rodríguez, Maximino Villarrica, Luis Manuel Naredo y Gumersindo Martínez. El presidente del comité entamaor foi Tano Collada y nel concursu participaren 45 llagares, lo que l’asitia ente los tres principales concursos en cuantes a participación, ello ye, Nava, Villaviciosa y la Primer Sidre l’Añu.
“Pa min en particular, el de Villaviciosa ye ún de los concursos que se lleven a cabu cuando la sidre ta nes sos meyores condiciones. La sidre que llega nestes feches de la collecha anterior a tener esta calidá, pa ganar un concursu, ye un méritu pergrande. Yo sé que tolos mios compañeros, como yo, tan esperando a ver cualu ye’l resultáu, toos train la meyor sidre que tienen y toos tienen la illusión de poder ganar. Entós, nun hai qu’allegrase demasiao nin entristecese demasiao. Delles de vegaes toca xubir pol premiu y otres felicitar a quien gane. Lo importante ye tar equí y participar” dixo pa esta espublización Samuel Trabanco istantes dempués de recoyer el gallardón.
