Apináu dafechu tola nuechi, el chigre tornó abrir les sos puertes nel barriu d’El Llanu en Xixón.
LA SIDRA.- Una multitú de presones demostró la bona acoyía que va tener la sidrería La Pumarada nel barriu d’El Llanu en Xixón. La renaguración del establecimientu tuvo llugar el miércoles primeru de marzu a les 19:30 la tardi. De magar abrió les sos puertes, tuvo llena dafechu. Toos queríen vivir en primer presona lo que va ufiertar esti chigre que torna abrir les sos puertes. El propietariu, Arturo Suárez Zapico, nun tuvo un respiru demientres tola nueche; pero gracies a los sos años d’esperiencia n’hostelería llogró que tolos asistentes quedaren más que satisfechos pol serviciu, cocina y bébora.
Los camareros, siempres sollertes a los veceros, echaron sidre Trabanco y Zythos demientres tola nuechi. La gran cantidá y variedá de pinchos sirvíos fixeron que los futuros veceros pudieren esfrutar entá más de la velada. Una de les tapes más emponderaes foi la de chorizu, anque la de xamón, tortiella de pataca o los bollos preñaos tampoco nun quedaron atras. Y lo más importante: la xente pasólo bárbaro.
“Foi una gran reapertura, yá facía falta un llugar asina” siñala una de les vecines del llugar. “Venir al barriu la sidre y que te falte La Pumarada… daba un nun sé qué. Pero afortunadamente tornó abrir. Deseyar lo meyor, porque nestos tiempos que cuerren hai qu’estimar que s’apueste por abrir llocales” siñala otru de los asistentes. Y ye que, amás de los platos típicos de la cocina tradicional asturiana, tamién se va tener en carta esquisites especialidaes comu bugres a la chapla o con arroz, ñocles tamién a la chapla o cocíes, centollos, andariques, parrillaes de mariscu y calderaes, pulpu amariscáu o con llagostinos y, por supuesto, una gran ufierta de pexe fresco.
Con esti rotundu ésitu, La Pumarada escomienza fuerte. La gran cantidá de presones qu’asistieron a la renaguración, y lo complacíes que quedaron, agoren un futuru más que falagueru pa esti chigre nel que la mayestría y maña d’Arturo pa llevalo, van faer que se convierta nun referente nel barriu la sidre.
