Ayeri llunes 6 demientres el Festival Intercélticu d’An Oriant (Lorient, Breizh) tuvo llugar la primera de les dos presentaciones que se fadrán del VIII Salón Internacional de les Sidres de Gala (SISGA).
El llugar escoyíu foi la carpa d’Asturies, onde los munchos visitantes pudieren conocer los detalles l’eventu al empar que tastiar les meyores sidres qu’algamaron premios nesti prestixosu eventu internacional. Mentantu conocíen les meyores sidres asturianes representaes polos llagares Castañón, Cortina, Riestra, La Naveta, Mayador y Viuda de Angelón, los amantes de la sidre deprendieron tamién les diferencies coles sidres d’otros países y el furrulamientu del SISGA.
Aparte d’una perbona selleición de sidre natural, natural DOP, esplumosa, de xelu y vermú de sidre, la sidre asturiano foi presentada xuntu con sidres d’otros siete países (Reinu Xuníu, Francia, Alemaña, Luxemburgu, Estaos Xuníos, ente otros). La dellegación de LA SIDRA y la Fundación Asturies XXI, entidá entamaora l’eventu, ufrieron notes de tastia ya detalles sobro los llagares participantes, a los qu’hebio qu’amestar sidre que llagareros del Festival Intercélticu aportaron pa la presentación. Dende equí agradecemos a les sidres Apple Slayer de Cornualles y Kystin de Bretaña pol so detalle, y tamos ciertos que tornaremos velos nesta edición del SISGA en Xixón.
La prósima cita ye esti miércoles 8 nel pabellón d’Asturies quí, n’An Oriant, y espérase que participen miembros de la prensa internacional, de la mueganización del festival, responsables de les delegaciones y tolos amantes de la sidre que quedaren con ganes de conocer más sobro’l nuesu eventu ya la cultura Asturiana de la sidre. Esti eventu faise gracies a la collaboración col Pavellón d’Asturies con Jesús Adrián Rodriguez Álvarez a la cabeza, quien cunta col sofitu la Oficina Turismu d’Asturies.
D’esta miente, Asturies afitó’l so papel comu nación celta ya embaxaora de la cultura la sidre, tantu nuesa comu internacional.
