Los ‘ilustres patilludos’: Gon, Wesley, Willy y Viña, asoleyaron el so primer álbum nel qu’inclúin el canciu “sidra en el llagar”, tema que ta arrasando nes redes sociales y que, ente otros llugares, foi grabáu nel Muséu de la Sidre de Nava.
LA SIDRA.- Son allegría musical en vena, direuta y ensin complexo. Hai unos pocos meses asoleyaron el so primer vidiuclip oficial Sidra en el llagar (realizáu por Marcos Pérez de Hestia Films), y en tiempu récor trunfaren nes redes sociales. Con más de 150.000 reproduciones y compartíu alrodiu de trés mil vegaes –y sumando- los Ilustres Patilludos fain un homenaxe a la nuesa bébora emblemático como namás ellos saben: divertíu, honestu y arguyosu de la tradición. Esta pieza, versión del clásicu irlandés Whiskey in the jar, cáncienla n’asturianu y nella participa’l conocíu intérprete de tonada Ismael Tomás.
Pero ésti caberu nun ye l’únicu que collabora con ellos nel so discu Chigrebilly, tamién lo faen Ángel Ruiz, el Coru Mineru de Turón o’l gaiteru Xuacu Fernández. El discu foi editáu por La Granja Records, productora independiente que pasu ente pasu ta atopando’l so sitiu na industria musical asturiana. Ocho son los temes que conforme esti trabayu col qu’esperen “convertise nun referente de la música pa la pura diversión n’Asturies”.
¿Quién integra los patilludos? Gonzalo Montes ‘Gon’ (voz y guitarra), Alejandro Pérez ‘Wesley’ (contrabaxu y voz), Alejandro Viña ‘Viña’ (batería) y Guillermo Castañón ‘Willy’ (guitarra).
