Sedrá’l prósimu vienres, el llagar de Piélagos tamién llevó los sos nuevos botellinos a Salón de Gourmets.
LA SIDRA.- Tamos entrando yá nel bon tiempu y los llagareros asoleyen nuevos y frescos proyeutos camentando nel branu. ún d’estos exemplos ye Sidra Somarroza, llagar de Renedo de Piélagos que nel anterior Salón Internacional de les Sidres de Gala cellebráu en Xixón algamó’l primer premiu como Meyor Sidre Esplumoso Dulce.
A entamos del añu pasáu punxeron a la venta dos botellinos: la sidruca y la sidruca dulce. Estos fueron un apueste por mor del so afán por innovar nel mercáu y dar más opciones a los consumidores. “El botellín ye cómodu porque permite dir a un establecimientu y pidir sidre ensin tener qu’abrir una botella entera” desplica la enóloga Cecilia Gómez.
Agora dan un pasu más nesta llinia y en Salón de Gourmets dieron a degustar el so nueu botellín: la Sidruca con llimón. Bébora bien fresca, dulce ensin ser dulzapaya, con arume a llimón y una misguinina de retrogustu que remembra al pulgu de la mesma fruta. Perafayaiza pa tomar fresca o incluso con delles piedres de xelu. Foi tou un procesu d’investigación lleváu por esta casa la que dio como resultáu esta nueva bébora que recibió bien d’empoderamientos demientres la feria enantes citada.
El prósimu vienres 5 mayu presentarán esti productu na llocalidá de Novales, yá qu’esta Sidruca fainla con y en collaboración cola asociación “llimones solidarios”. “Ellabórase de magar sidre Somarroza con un toque únicu pal consumidor d’anguañu, amás úsase zusmiu procedente de llimones de Novales, contribuyendos a la so causa solidaria” despliquen dende Somarroza. “Llimones solidarios” surde de la intención de paliar el desemplegu nel conceyu d’Alfoz de Lloréu, especialmente nos colleutivos más desfavorecíos.
