Turismu tamién otorgó esta reconocencia al concursu hípicu de Xixón y la travesía de la mariña naviega
LA SIDRA.- “Los cuatro eventos destaquen pola calidá de la so organización y la so capacidá p’atrayer visitantes” siñaló la Conseyería de Cultura, Política Llingüística y Turismu. Asina les fiestes y actividaes d’interés turísticu de Asturies sumen 67 cellebraciones.
El Conseyu Asesor de Turismu consideró acreditaos los requisitos necesarios pa qu’estos cuatro eventos pasen a formar parte del llistáu de les fiestes d’interés turísticu rexonal pola so orixinalidá, tradición popular, valor sociocultural, antigüedá, capacidá d’atración o cellebración en fecha periódica. Toos ellos destaquen pola calidá de la so organización y pola so capacidá p’atrayer visitantes.
“La fiesta ‘La so excelencia la fabada’ cellébrase dende fai 40 años en La Felguera ya intenta potenciar el caltenimientu de la tradición popular y la coperación na organización. La reconocencia y la collaboración de los restoranes de la fastera, que participen cuasique na so totalidá, refrenden l’atractivu d’esta fiesta, que xorreció enforma colos años” siñaló la conseyería.
Sobro’l Certame del Quesu Casín indicó que dende’l 2015 espón toles variedaes d’esti productu artesanu, que’l so llargu y complexu procesu d’ellaboración conviértenlu nun quesu especialmente atractivu. “La cita foi ganando asistentes nes seyes ediciones cellebraes fasta agora ya inclúi, amás d’esposición y vienta, talleres d’ellaboración, concursos de cocina casina, talleres d’artesanía y actuaciones de grupos folclóricos”.
