La décimu cuarta edición del Salón Internacional de les Sidres de Gala –SISGA-, que va celebrase la última selmana de setiembre, vien cargada d’interesantes propuestes pensaes para dar a conocer más en fondura non solo la sidra, sinón la cultura y gastronomía asturiana a los visitantes d’otros países, averando coles mesmes al públicu asturianu tantu la sidra internacional como los productos ellaboraos en Asturies, reforzando los venceyos comerciales y la xunión ente sidreros del mundu
Al SISGA alleguen llagareros de trés continentes, siendo lóxicamente la más abondosa la delegación europea, pero cuntando tamién con participantes asiáticos y americanos. Esti añu ye destacable concretamente la fuerte presencia de profesionales que vienen dende los países bálticos.
La presencia internacional -tantu de llagares como d’importadores y periodistes de prensa especializada- nel SISGA, garantiza la visibilidá de la sidra asturiano y ábre-y caminos en mercaos esteriores, de la qu’ufierta a los asturianos una visión global de la redolada sidrera, muncho más amplia qu’a la que tamos avezaos, faciéndolos coscientes del bon llugar qu’ocupen los nuesos productos dientro d’un universu tan ricu como ye’l de la sidra.
La inauguración oficial va ser el xueves 26 a les dolce y media nel Hotel Zentrsl Rei Pelayo, en Xixón, con una intervención de Marcos Abel Fernández Marqués, presidente de la Fundación Asturies XXI. A partir d’ende van asocedese les tasties guiaes, les visites, charres y recepciones oficiales qu’integren les actividaes d’esti eventu, ensin escaecese de la entrega de los prestixosos Premios SISGA a los productos de mayor calidá ente los presentaos.
El momentu más esperáu pol públicu xeneral sedrá la Tastia Abierta, na que de 11:00 a 15:00 y de 17:00 a 20:00 podrán probase más de 80 productos sidreros de la man de los sos ellaboradores, participando amás en tasties guiaes y charres imparties por espertos. Esti añu tornará cellebráse nel recintu ferial Luis Adaro y aunque habrá productos d’al menos tres continentes, tenemos claro que la sidra asturiana despertará tantu interés como la foriata, ya que pa bona parte del públicu asturianu delles de les propuestes de los nuesos llagares son tan desconocíes comu les trayíes d’otres partes del mundiu, por mor de la gran variedá de productos nuevos que tan elaborándose nos llagares asturianos.
Anque -quitando la Tastia abierta del sábadu- munches de les actividaes tán pensaes pa profesionales del sector, na mayoría d’elles habrá unes poques places, alredor d’una decena, acutaes p’aquelles persones que deseyen participar, teniendo amás la oportunidá de conocer en directu a los protagonistes del SISGA y l’escepcional ambiente profesional que s’alienda nesti eventu.