La sidrería xixonesa La Montera Picona de Ramón collabora con un euru por ca sidrotapa que se venda a la campaña de l’Asociación Alcer pa facer más llevaera la diálisis
De siempres ye sabío que la sidre ye bono pal reñón, pero lo que nun sabíemos ye que pa los enfermos del reñón tamién son bones dalgunes sidreríes. En concreto, la Sidrería La Montera Picona de Ramón, que cola so iniciativa ayuda a facer la vida más fácil a enfermos del reñón y tresplantaos, collaborando cola Asociación d’Enfermos Renales Alcer.
La idega, que partió del propiu Emilio -propietariu de La Montera Picona- llámase Sidrotapa y durará tol mes de marzu, donando un euru por cauna que se consuma. La Sidrotapa consiste nuna botella sidre Menéndez DOP. con tapa a escoyer pente Chorizu a la Sidre, Muxones a la Mariñana, Sabadiegu a la Chapa o Güevos rotos con Xamón, tou por ocho euros de los que, recordemos, ún va parar a Alcer.
La Montera Picona foi tamién l’escenariu de la presentación del programa d’Hemoterapia recién puestu en marcha por Alcer pa facer más llevaero el tratamientu de los 1200 asturianos que se someten a diálisis n’hospitales asturianos, un tratamientu qu’implica tar delles hores coneutáu a una máquina, polo que la campaña fae por distrayelos nesi tiempu con pocu d’allegría en forma de música, maxa, cuentos o bailLoterapia. Ello ye posible gracies a iniciatives comu esta y a persones comu la cantante Arancha Miñán, que collabora voluntariamente cola asociación. Aparte d’esta campaña, Alcer Asturies ufre a los pacientes un soporte continúu, con cuestiones comu sofitu sicolóxicu y nutricional, asesoramientu pa realizar trámites y talleres.
