Picu La Salar y Casa Nando completaron el podiu del concursu d’esti tradicional platu, celebráu en Turón
LA SIDRA.- La Sidrería Román, de Xixón, ellabora “El Pote Perfectu”. L’establecimientu hosteleru alzóse col primer premiu nel certame asturianu d’esti tradicional platu, celebráu en Turón. El podiu completolur Picu La Salgar, de Llanes, y Casa Nando, de Turón, que tamién llevó’l premiu a la meyor ellaboración del valle turonés.
La Sidrería Román llogró asina imponese a los otros 19 finalistes que prepararon en directu les sos ellaboraciones nel Colexu Vega de Guceo de Turón por que les tastiara l’esixente xuráu, formáu pola cocinera Cristina Rey, ganadora en dos ocasiones del concursu (Restorán La Gitana-Xixón); Juan Luis González, propietariu de Casa Belarmino (Gozón); Ana Fe Fernández, cocinera del Cenador del Azul (Mieres); Pablo Ramos, profesor de la Escuela d’Hostelería de Xixón; Marcos Cienfuegos, cocineru; y Segundu Riesco, xefe del Departamentu d’Hostelería del IES Valle d’Ayer.
Toos ellos valoraron el gran nivel de les ellaboraciones presentaes. Pero nenguna meyor que la que sirvió la Sidrería Román y que-y valió pa llograr el primer premiu de la VI edición del Concursu “Esplorando’l pote perfectu”, enmarcáu nes XXXII Xornaes del Pote del Valle de Turón, declaraes d’Interés Turísticu Rexonal y que se celebren del 1 al 10 d’avientu n’once establecimientos hosteleros del valle turonés. El certame ta entamáu pol Conceyu Mieres, la empresa d’eventos gastronómicos Gustatio, la Sociedá Turonesa de Festexos y l’Asociación d’Hostelería y Turismu del Valle de Turón, col patrociniu d’Embutíos Vallina y les fabes de Camín Astur.
RELLACIÓN DE FINALISTES
bar Cubia (Uviéu)
Casa Morán (Collanzo, Aller)
Casa Nando (Urbiés)
Casa Repinaldo (Candás)
Centro de Mayores de Turón (Turón)
Comidas Naon (Viella, Siero)
El Parador del Rey (L.Lena)
El Sitiu de Ñarres (Xixón)
El Tendejón de Fernando (Las Regueras)
La Caleyuca Bar-Tienda (La Güeria de Urbiés)
La Consistorial (Mieres)
La Gotera de Jorge (Turón)
La Paloma (Uviéu)
La Sauceda (Buelles, Peñamellera Baja)
La Tabernilla de Uviéu (Uviéu)
Las Tablas del Campillín (Uviéu)
Michem (Villabona, Llanera)
Picu La Salgar (Llanes)
Sidrería Román (Xixón)
Zascandil (Xixón)
