El colloríu chigre dispón de dos espacios estremaos onde tastiar dende unes tapes a cellebrar xintes d’empresa o xuntes familiares.
LA SIDRA.- Jose Ramón Maseda Conejero empicipió a echar sidre a los 16 años y, en pasando por distintos establecimientos de restauración y dellos concursos d’echáu, convirtióse n’una pieza fundamental de la Sidrería El Restallu, na que trabaya dende fai 14 años.
Los mesmos años que lleva sirviéndose nesti establecimientu’l so platu estrella, l’arroz con bugre, anque ensin desmerecer otros platos basaos en pexes y mariscos del Cantábricu, que pueden tomase acompañaos de bona sidre Peñón y Zhytos DOP del Llagar Herminio.
Entrugáu pola triba de veceru habitual del chigre, Jose Ramón coméntanos que suel ser un veceru fiel a sidre Peñón, anque tamién vien muncha xente nuevo por encamientu, de dientru y fora d’Asturies, ya inclusive estranxeros en dómina braniega.
Una de les coses que más-yos llama l’atención ye’l preciu la botella de sidre, que consideren increíblemente baxu. Ello ye que de primeres dulden en pidila, cúntanos Jose Ramón, pensando que van pagar un preciu averáu al d’una botella de vinu.
Y, una vegada que la preben, repiten. Encantaos cola calidá de la nuesa bébora por escelencia y el bon echáu de los cinco profesionales que trabayen nesti llocal.
Mañana va ser el decimonovenu aniversariu del chigre, un motivu más para visitalu y tastiar unos bonos culinos. ¡Felicidaes!
