Inés Reis ye una convencía de los echaores automáticos y nun duda nin un momentu en destacar les sos ventaxes “son más llimpios, la sidrería güel meyor, nun chisquen, la calidá de los culetes ye la mesma que si la echa un camareru, sal igual d’esplumada… de los mios veceros nun protestó naide, a la escontra, yo creo que dende que punximos los echaores tovía tomen más culinos.”
Pa ella los echaores automáticos foron providenciales, especialmente cuando, va tres años, quedó sola col so fíu al frente’l negociu familiar: yera imposible atender, cocinar y echar la sidre entre solo dos persones, asina que decidieron dexar d’echalo y utilizar namás los aparatos, tanto na barra como nes meses ya’l comedor.
Anantes, cuando’l so home echaba los culinos na barra, ya utilizaben echaores pa servir la sidra nel comeor, primero na so versión artesana, ello ye, afuracando’l mesmu corchu, lluéu los taponinos verdis y, dende que salieron los automáticos, nun dexaron de tenelos a dimposición de la vecería.
Ya pasaron por varios modelos dende aquel primer Isidrín, va más de 15 años: tuvieron el de la mazanina, el del Sporting, el del Barça… agora tan mui contentos col del tonel, non mui grande, cómodu y manexable; pa Inés “son los que meyor echen porque tienen l’echaor perriba”.
La sidre que tienen siempres en El Maldito ye del Llagar Arsenio, clientes de la sidrería y tamién un negociu familiar, como’l suyu, con quienes tan seguros de que siempres-yos van traer un bon palu, “cosa que los llagares grandes non siempres garanticen a una sidrería piqueña como esta”.
El Maldito. Feijóo 79. Xixón T. 984 19 03 85
