Fundada en 1999, lleva’l conceyu Valdés al castizu barriu madrilanu.
LA SIDRA.- El zaragateru barriu de Lavapiés, en Madrid, cunta dende fai cuasique dos décades con un requexu típicamente asturianu onde tastiar nuesa escelente gastronomía.
Fundada por dos socios y primos de L.luarca, la Sidrería Casa d’Asturias ye un local decoráu al estilu clásicu de los chigres asturianos de los años 70. Tien amás terraza y salón priváu pa cellebrar tou tipu d’eventos.
La so carta ufierta una amplia variedá de platos tradicionales como les pataques al Cabrales, el pastel de tiñosu, el revueltu d’oricios o d’ortigues, los chorizos a la sidre o les cogordes al Cabrales.
Tampoco nun falten los platos de cuyar como la fabada asturiana, fabes con amasueles o’l pote asturianu pel hibiernu.
En custión de carnes, procedentes de la so propia ganadería familiar, destaquen el sollombu al Cabrales, el churrascu de güe y el cachopu, ganaor del premiu al Meyor Presentáu nes V Xornaes del Cachopu de Madrid cellebraes en marzu.
Y pa los amantes del pexe, ufiértase la merluza a la sidre y el pixín al fornu, la so especialidá.
Finalmente, ente la variedá de postres caseros, el más encamentáu son los frixuelos rellenos d’arroz con lleche.
To ello regao con sidre asturiano de Trabanco y Trabanco d’Escoyeta, bien echao a la manera tradicional.
