Ca vegada paez más claru que’l turismu de calidá n’Asturies pasa por implicar al visitante na cultura sidrera, porque ¿quién pue presumir de conocer Asturies si nun prebó en condiciones la sidre?
LA SIDRA.- El turismu ye un arma de doble filu pa la sidre. Naide dulda de que ye necesariu que cualesquier visitante que llegue a Asturies sala d’equí conociendo los conceutos más básicos de la sidre. Tampoco nun pue resalviase’l poder dinamizador y difusor que tien el turismu a la hora de dar visibilidá a la nuesa sidre.
Sicasí, dengún asturianu/a pue escaecer esos culinos posaos etenramente sobro la mesa, esa sidre bebío a suerbos como si fuera un Rioja o la insistencia en beber fasta la postrer gota de la madre o pidir que se-yos sirva la sidre xelao.
Tampoco nun podemos dexar de llau la influencia que los turistes tán teniendo sobro los nuesos propios vezos sidreros. Nun puede negase la so contribución al espardimientu del “taponín”, acesoriu que teóricamente aída na puntería pero que, si nun s’echa, nun sirve absolutamente de ná; y apocayá, col so desconocimientu de la cultura sidrera, causaron l’impensable alderique sobro la posibilidá de vender sidre por culetes, nin siquier de tonel, sinón de botella, dexándola abierta y escomenzada indefinidamente, col acabamientu de calidá qu’ello implica.
Entrugamos a dalgunos de los nuesos chigreros cuala ye la so esperiencia personal colos turistes, qué grau d’interés amuesen pola sidre y si-yos gusta. De camín, cúntenmos delles anécdotes.
