La comedia ástur-pop” llega al país el vienres 12 de xunetu a les 20:30 hores y va representase nel Teatru Xovellanos
LA SIDRA.- ‘Sidre en Vena’, comedia ástur-pop y embaxaora de la candidatura de la Cultura Sidrera a padremuñuinmaterial de la UNESCO —al igual qu’esti mediu comunicación—, llega a Asturies el 12 de xunetu al Teatru Xovellanos. “Esta obra, del autor xionés JuanMa Pina, lleva trunfando nel Teatru Lara de Madrid dende setiembre de 2018 y preslla la temporada pa venir a Xixón” siñalaron dende l’Ayuntamientu Xixón.
Como indica la productora Montgomery Entertainment: “Sidre en vena ye una comedia qu’entemez el vodevil coles series televisives, los xiros inesperaos coles infidelidaes, les pasiones, los barruntos y les vengaciones de doce presonaxes interpretaos por cinco actores. Sidre en vena ye Berlanga. Sidre en vena ye Dinastía, un Falcon Crest del mundiu la sidre. Sidre en vena ye fabada presentada nuna llata de Campbell’s. Sidre en vena ye una comedia ástur-pop”.
El so argumentu ta basáu na familia Pumarada —dueño de Sidra Pumarada, el llagar más importante del oriente asturianu—, decide cellebrar la nueche de San Xuan na so casa de Ribeseya. El patriarca convida a los sos trés caprichosos fíos, que van venir dende Uviéu acompangaos de maridos, amigos y taxistes. “Toos van asistir cola fin de vengase y asina cerrar el pior iviernu de les sos vides. Una nueche onde sangre y sidre van correr a partes iguales. Cachopos envelenaos, gaites rotes, orbayu costante y la Virxe de Cuadonga ausente” desplica la productora.
