El Conseyu Regulador de la Denominación d’Orixe Protexía Sidre d’Asturies escueye al músicu Rodrigo Cueves pa protagonizar la so nueva campaña so’l llema “Auténticu”.
“Ye una oportunidá única pa esponer los valores que defendo; sostenibilidá, vida nel campu, tradición… valores que nun tán reñíos cola modernidá y el sentíu del humor”, cúntamos Rodrigo Cueves, músicu asturianu y fenómenu nes Redes Sociales. “Pa un asturianu pidir sidre DOP tendríe de ser lo llóxico; significa trabayu n’Asturies, crear un seutor de calidá, una defensa de lo autóctono conectao a la realidá […] nun se trata d’una simple etiqueta, pa los asturianos los beneficios del consumu de sidre con denominación son incontables”.
Rodrigo Cueves comparte y defende los valores de tradición anovada y autenticidá que’l Conseyu Regulador de la Denominación d’Orixe Protexía Sidre d’Asturies quier tresmitir na so nueva campaña. “Buscábamos daqué distinto, innovador. Fuxir de los llugares comunes y apurrir una imaxe pa la sidre con denominación más acorde a l’actualidá al empar que comunicamos el calter auténticu de la sidre DOP, fecha 100% con mazanes asturianes y siguiendo’l procesu tradicional,” diz Tino Cortina, Presidente del Conseyu Regulador de la Denominación d’Orixe Protexía.
Pa esta campaña, Rodrigo usa la so peculiar indumentaria basada n’elementos del traxe tradicional asturianu entemecíos con munches de les sos desemeyaes influencies, que van dende El Presi a Lina Morgan, pasando por Freddie Mercury. Él declarase bebedor “casi a diariu” de sidre y echaor oficial del so grupu amigos.
La campaña, criada pola axencia de publicidá uvieín Arrontes y Barrera, pue vese estos díes en dellos medios d’Asturies como valles, mupis, prensa, televisión, radio, etc.
