El festival va cellebrase en Mieres, del 13 al 15 d’abril.
LA SIDRA.- La tradición, la música folk y la gastronomía asturiana van tener cita un añu más en Mieres el prósimu mes.
La sidre va ser la gran protagonista, con unos 30.000 llitros d’estremaos llagares partíos pola Hermandá San Bartolomé de Baíña. El preciu del vasu va ser de 3€ y la sidre va tar acompañada por unes 1.000 bolles de la Folixa.
El vienres 13 d’abril, Carlos Muñiz, presidente de Amicos, va dar el pregón tres la espicha de les pipes de sidre y Xuacu Amieva va recoyer el distintivu “Fini Suárez” pol so trabayu como recuperaor del padremuñu cultural asturianu.
El mesmu díi va cellebrase un festival de la tonada, los “Alcuentros col folclor” y los “Cancios de Chigre”. La xornada va rematase con música nel Parque de Xovellanos, de la man de los clásicos Los Berrones y los reivindicativos Skama la Rede.
El sábadu va haber delles actuaciones, pasacalles de grupos folclóricos y bandes de gaites peles cais de Mieres, amás de xuegos tradicionales infantiles. Pela nueche, la música va correr al cargu del gaiteru Rubén Alba y la banda internacional Lúnasa.
El festival va cerrar esta edición el domingu 15 d’abril cola actuación na plaza Requexo del grupu folclóricu Prau Llerón y esporte tradicional nel Parque Xovellanos.
