Esti proyeutu tien como oxetivu xuncir al seutor sidreru y turísticu pa espublizar los sos valores como recursos diferenciadores del nuesu país
LA SIDRA.- Sidreturismu Asturies fixo entrega, de los distintivos qu’acreiten a 35 empreses asturianes como miembros del Clú de Productu Sidreturismu Asturies. L’actu tuvo llugar na Sala Xuntes de la Universidá Llaboral, y cuntó coles intervenciones d’Ana Soberón, en representación de l’Asociación Clúster d’Empresarios de Turismu Rural d’Asturies; el presidente de la DOP Sidre d’Asturies, Guillermo Guisasola; per parte de la Sociedá Pública de Xestión y Promoción Turística y Cultural del “Principado” SAU, Graciela Blanco; y el direutor de Sepinum, Julio Grande.
Esti proyeutu, impulsáu pol Clúster de Turismu Rural y el Conseyu Regulador de la DOP Sidre d’Asturies, tien como oxetivu xuncir al seutor sidreru y turísticu alrodiu d’un Clú de Productu cola fin de dar puxu y espublizar la sidre y la cultura sidrera asturiana como recursu turísticu diferenciador. “Güei ye un díi importante pa la sidre d’Asturies. D’equí p’arriba, al llau de les 35 empreses xuntaes, vamos dar puxu a actividaes y programes que-y dean valor y visibilidá a la sidre y a Asturies”, destacó Guillermo Guisasola.
Julio Grande fixo fincapié nel papel que cumple esta bébora nel nuesu país. “La sidre ye’l productu estrella del catálogu gastronómicu asturianu. Con iniciatives como esta pretendemos aidar a la supervivencia del mediu rural asturianu”. Ana Soberón, pela so parte, estimó’l compromisu y l’implicación de caúna de les empreses xuntaes, ente que Graciela Blanco definió la sidre d’Asturies como “un conxuntu de manifestaciones qu’entendemos indisolubles del nuesu país y un recursu turísticu que nesti proyeutu tien más fuerza entá”.
Fasta un total de 35 empreses fueron reconocíes nesti actu cola placa acreitativa: Albergue La Yalga, Andolina Tours, Aptos Balcón Real, Casa Carín, La Vieja Pontiga, El Pilpayo, las casonas de Ablanos de Aymar, El Castañiu, Quintes, Mariluz, Xuacu, La Escuela, Cuetu Calter, El Gaitero, las fincas de El Campón y La Barrea, Hostería de Torazo, los llagares Acebal, Herminio, Quelo, Trabanco, Castañón, Cortina, Fran, JR, los apartamentos rurales La Torre y San Félix, Casa de la Montaña, Deporaventura, El Bosque de las Viñas, Gran Hotel Cela, Palacio de Meres, The Old Seaman, La Montaña Mágica y Yeguada Albeitar.
