Fundáu en 1994, el so propietariu intenta treslladar un trocín de la so “patria quería” a la islla balear.
LA SIDRA.- Asitiáu nel puertu esportivu de Santolaya, esta sidrería-parrilla convirtióse nun referente de la cocina asturiana n’Eivissa.
El so propietariu, el peculiar Juan Tarrazo, ufierta un menú de 25 euros per presona nel que s’inclúi un aperitivu de bollos preñaos, siguíu por un entrante d’ensalada de salmón afumiáu, quesu de cabra caramelizau, frutos secos, endivies y mazana, aliñado con una vinagreta casera de mazana.
De siguío, sírvese’l platu estrella de la casa: cachopu con pataques frites y pimientos de Padrón. Y, pa rematar, postre caseru: crema de quesu frescu asturianu con sabor a miruéndanos y café. El menú tamién inclúi dos botelles de sidre o una botella de vinu Rioja.
Amás d’esti fabulosu menú, la so carta destaca poles sos carnes con denominación d’orixe asturianu, cocinaes al caricote de carbón y les sos tables de quesos y patés.
Coles mesmes, esti añu decidieron cellebrar les II Xornaes del Cachopu, por mor del gran ésitu collecháu na edición anterior.
Tocantes a la sidra, Juan tienlo claro: los sos padres son orixinarios de Tinéu, asina que La Llarada ye’l llagar escoyíu pa tastiar los sos platos.
