La Fiesta de la Sidre de Xixón caltiénse pesia toles restriciones impuestes pol COVID-19
LA SIDRA.- Pesia les munches llimitaciones que supunxo l’andanciu que carecemos, y que llevó que se cellebraren a puerte presllada’l XXVII Concursu Oficial d’Echaores y el Premiu a la Meyor Sidre, conocíu como “Eloxu d’Oru”, y que llevó a suspender el Récor d’Echáu Simultánia, los Cancios de Chigre o la Tastia Pública; l’enfotu y la voluntá de tar perriba les circustancies fexo que nun llegare a suspendese esta fiesta sidrera referencial nel panorama asturianu.
Destacar la vitalidá del Mercaín de la Sidre y la Mazana, abiertu del 21 al 30 d’agostu y con puetinos tantu nos Xardinos de la Reina como na Plaza L’Ayuntamientu, y nel que se pudo atopar toa triba d’espresiones d’estos productos tan emblemáticos, dende pan, quesos, marmiellaes, xabón, llicores… a cerámica y orfebrería. Ensin dubia, esti Mercaín va algamando añu ente añu mayor conteníu y convirtiéndose nuna exa referencial de la propia Fiesta de la Sidre.
El Concursu Oficial d’Echaores tevo a Jaison Franco como ganaor, siguíu de Wilkin Aquiles, y cuntó con ná menos que 37 participantes, y les Charres sobro la Sidre, que se cellebraron tamién con aforu llimitáu, tovieren como protagonistes a Jose Antonio Norniella, Eduardo Vázquez, Enrique Dapena y Luis Benito García.
A la fin, destacar el trunfu de la sidre del Llagar Quelo -Tiñana, Siero- que lleva’l prestixosu “Eloxu d’Oru” d’esti añu.
