Participaron 40 llagares nesta VI edición cellebrada na sidrería La Montera Picona de Ramón en Xixón: la sidre ganador convirtióse na oficial de la Primer Sidre l’Añu que se cellebrará del 18 al 21 d’abril nel Museú del Pueblu de Asturies
Prado y Pedregal DOP del llagar La Morena, allugáu n’Alto de Viella en Siero, foi la ganadora de la Meyor Primer Sidre l’Añu. El segundu llugar foi pa Sidra Riestra y el terceru pa Sidra Buznego. Tamién fueron finalistes J. Tomás y Contrueces –cuartu y quintu, respuctivamente–; mentea que Fonciello, L’ Allume y Cortina quedaron n’orde de sesta a ochava, tamién respeutivamente.
El sábadu 13 d’abril llevóse a cabu la VI edición del concursu La Meyor Primer Sidre l’Añu con 40 llagares iscritos. El certame, entamáu pola revista La Sidre y la FUNDACIÓN ASTURIES XXI, tuvo llugar na sidrería La Montera de Ramón en Xixón. La preseleición escomenzó a les 11:30 hores y nella escoyeron les sidres finalistes. En total fueron ocho, una y bones la preseleición constó de dos etapes. L’oxetivu yera qu’en caúna d’elles escoyeren les trés meyores sidres, pero hebio empate en dambes etapes. De manera qu’en total ocho sidres fueron les que pasaron a la final de la tarde: J.Tomás, Contrueces, Buznego, Riestra, Cortina, Fonciello, L’Allume y Prado y Pedregal del llagar La Morena.
A les 16:30 escomenzó la cata final coles sidres preseleccionaes. Les sidres probáronse nuevamente nuna tastia a ciegues y escontra les 18:30 hores llegóse al siguiente veredictu: Sidra Prado y Pedregal DOP del llagar La Morena algamó 100 puntos de 120 posibles, Sidra Riestra llogró 99 y Sidra Buznego 96.
El xuráu tuvo presidíu por Manuel G. Bustu, y costituyíu por Joaquín Fernández, Armando Lloreo, Manuel Castro, Rosa María Valdés y Jesús Paesa. L’asistencia a les deliberaciones foi abierta al públicu. Al términu del concursu los asistentes qu’asina lo deseyaron pudieron prebar les sidres clasificaes.
Pal serviciu d’echáu cuntóse colos echaores Alejandra Venegas y Héctor Prieto de La Montera Picona de Ramón y de la Sidrería Parrilla Ramón, que participen nel Campionatu Oficial d’Echaores de Asturies.
D’esta miente, Sidra Prado y Pedregal convirtióse na sidre oficial de la X edición de la Primer Sidre l’Añu –PSLA–. Hai que destacar que ye la primer vegada qu’una sidre acoyío a la Denominación d’Orixe Protexida gana esti certame.
La PSLA ye la espicha más grande d’Asturies y marca l’empiezu de la temporada sidrera. va cellebrase del 18 al 21 d’abril nel Muséu del Pueblu d’Asturies en Xixón.
El premiu a la Meyor Sidre l’Añu ye l’únicu concursu que tien como protagonista la sidre ensin trasegar y que tien retribución económico –1.000 euros en sidre–. Por esti motivu asitióse como un de los concursos de referencia de la nuesa bébora tradicional, siendo’l segundu en cantidá de llagares inscritos.
Dende va diez años LA SIDRA y la Fundación Asturies XXI entamaron a trabayar pola recuperanza de la sidre ensin trasegar, que prácticamente sumiera del mercáu pola industrialización de los llagares y l’aplicación xeneralizada de los trasiegos. Ca vegada son más los llagares que s’animen a comercializar esti tipu de sidre y que participen nesti certame.
(Semeya, pola manzorga: Héctor Prieto, Armando Lloreo, Manuel Castro, Manuel G. Bustu, Alejandra Venegas, Rosa María Valdés, Joaquín Fernández y Jesús Paesa. /Fotógrafu: Ástur Montes)
