Na tardi del vienres 29 de setiembre una representación de llagareros xaponeses van presentar la so sidre nel Muséu de la Sidra de Nava, dientro de les actividaes del XIII Salón Internacional de les Sidres de Gala -SISGA’23-
Arriendes de la visita d’una delegación de la Fundación Asturies XXI al país del sol naciente reafitáronse los venceyos comercial y sidreru ente Asturies y esti país, tan estremáu de la nuesa xeografía, la nuesa cultura y la nuesa idega de la sidre. Sicasí, les últimes décades la sidre foise incorporando al so consumu y producción, costituyendo la puerta a un gran mercáu, l’asiáticu.
Xapón, col so entusiasmu pola anovación, ta entrando na redolada sidrera y non solo prebando ya importando sidre, sinón definiendo los sos propios enclinos. La influencia de la sidra asturiano faise evidente na busca d’una sidra natural, d’estilu propiu, ensin penerar y ensin agregos, pero tamién esperimenten con productos y formatos similares a la sidre inglés o inclusive la bretón.
Si hubiere de destacar daqué en concretu sobro la producción de sidrenipono sedría’l so estremu curiáu de les pumaraes, qu’esplica’l so enclín a ellaborar sidres monovarietales, aspirando más a la calidá de productos orgánicos y de cercanía qu’a la cantidá de producción.
Quien quiera conocer más de cerca esta ñaciente cultura sidrera, va tener la oportunidá de faelo esti vienres a les 6 de la tardi nel Muséu de la Sidre de Nava, nuna xornada dedicá n’esclusividá a la sidre xaponés, con tasties guiaes, charres y degustaciones a cargo de Tatsuro Fuji de Fukiware Cidrerie, que van averar al públicu asturianu estes esclusives sidres. Entrada de baldre, pero places llendaes.
Tamién va tar disponible una escoyeta de les mesmes na tastia abierta que va tener llugar el sábadu 30 de setiembre, de 12 a 15 y de 17 a 20 hores, n’una de les mayores degustaciones de sidres de copa d’Europa, nel Pabellón de Congresos de la FIDMA, na que por namás 10 euros van poder tastiase 287 sidres de 92 llagares de trés continente.
