La popular Preba de la Sidre de Gascona vióse esti domingu pasáu alteriada per segundu añu consecutivu polos motivos sanitarios que toos conocemos.
LA SIDRA.- Sicasí, pa caltener viva la esencia festiva del díi grande del Bulevar de la Sidre, l’Asociación de Sidreríes de la cai Gascona, d’Uviéu, entamó una tastia con sidre de 18 llagares asturianos que, como novedá, los mesmos llagareros teníen de valorar y puntuar en tastia a ciegues.
La ganadora foi Sidra Cortina, una sidre virtuoso a la vista de los llagareros, qu’amás, valoraron bien positivamente un formatu de tastia que podría reproducise n’años vinientes. Una nueva forma de celebrar esta xornada que, percima de los resultaos finales, sentó xuntos a los principales llagareros del país, qu’aprovecharon l’alcuentru p’aldericar sobro’l presente y futuru de la sidre asturiano.
A falta pos de la multitudinaria Preba d’antaño, Gascona tornó ser centru neurálxicu del mundín sidreru nun eventu inéditu, colos llagareros y les sos sidres como grandes protagonistes, nel que Cortina resultó la “Sidre más prestosa” 2021.
