Nomarán ‘Confráderes d’Honor’ a Xuacu Amieva, Tere Blanco, Sidra Viuda de Angelón y la Fundación Belenos
LA SIDRA.- El sábadu 28 d’ochobre, a les 17 hores, tendrá llugar nel Muséu de la Sidre de Nava, la cellebración del VI Gran Capítulu de la Bona Confradería de los Siceratores, que se cellebra davezu ca medios años, pero que nesta ocasión lleva una edición de retrasu por mor del Covid.
Nesti VI Gran Capítulu nomaránse ‘Siceratores d’Honor’ distinción cola qu’homenaxeen a presones y entidaes polos sos llogros y llabor nel mundiu de la cultura asturiana, que nesta ocasión recayeron nel prestixosu gaiteru Xuacu Amieva; Tere Blanco –dedicada al alquiler y venta de traxes del país dende va cuasique 50 años-; Llagar Viuda de Angelón, ún de los llagares navetos referenciales; y a la Fundación Belenos pol so llabor nel campu de la etonografía asturiana.
Al actu tan convidaes toles confraderíes gastronómiques del país, anque suelen cuntar con visites de fuera d’Asturies. Tres l’actu saldráse en procesión dende’l muséu pelos llagares navetos, al oxetu degustar la sidre’l duernu que tan ellaborando agora mesmo, y pa finar la xornada habrá una espicha tradicional na Sidrería Villa de Nava.
