George Neagu, de la Sidrería Ramón, algamó’l primer puesto na categoría llocal.
LA SIDRA.- Xixón teníase–y resistío, pero por fin, Salvador Ondó, ganó’l Concursu d’Echaores mesta ciudá. El concursu forma parte del Campionatu Oficial d’Echaores d’Asturies que se fai per tol país. Dicha preba llevóse a cabu ayeri dientru les actividaes de la Fiesta de la Sidre de Xixón y nesta participaron echaores distribuyíos en tres categoríes: xeneral, xuvenil y llocal. El trunfaor d’esta postrera foi George Neagu, de la Sidrería Parrilla Ramón. Na categoría xuvenil concursaron Alexandra Castellanos y Ángela Castellanos de la Sidrería Fonte Villoria; y Edna Montes, qu’algamó la mayor puntuación nesti rangu d’edá.
La competición escomenzó haza les cinco la tardi na Plaza Mayor. Decenes de presones congregáronse frente al escenariu p’adicar detenidamente l’arte del echáu. Más de 40 echaores iscribiéronse a la preba, batiendo récor de participación. Salvador Ondó tuvouna puntuación de 116,60 puntos que lu fexo quedar en primer puestu del podiu. Siguiéronlu Jeison Franco, d’El Madreñeru, con 116, 30; y Jorge Vargas, con 116,10. Como se ve la final tuvo reñía y da muestra de la calidá que se ta algamando en ca etapa.
“Prestóme muncho ganar, yera ún de los premios que me faltaba. Los mios compañeros de la sidrería y yo tenemos una sana rivalidá que mos aida a meyorar. Yo animo a tola xente que s’anime a concursar, hai unos rapazos que s’apuntare agora y tan faciéndolo perbien. El llabor de los entamaores, del xuráu y la nuesa, que yá somos veteranos ye deci-yos que vaigan p’alantre, que nun se desanimen, porque tamién nós escomencemos dende abaxo” siñaló Ondó pa esti mediu comunicación. Pel so llau, George Neagu, indicó: “Púnxeme pernerviosu cuando taba arriba, pero al final salió bien. Toi feliz”.
