Coles llimitaciones impuestes pol andanciu del coranovirus, toviemos la ocasión de prebar el campanu del Seya 2020, que sacó Josechu Fierros y qu’alquirió José Manuel Mori “El Marqués”, y que degustemos nel so restorán La Ría del Campanu de Ribeseya.
Ná que ver, quien busque semeyances ente’l salmón de cultivu y el salmón del Seya pierde’l tiempu. Nun hai que tener un paladar especialmente educáu p’alvertir el xuegu de saborgos, la testura del productu, l’arume inclusu, entá más cuando a un bon productu se-y amiesta un bon faer como foi esti casu.
Magar el restorán cunta con una carta bien variada y petecible, nesta ocasión el protagonismu yera pal salmón del Seya, y pa la degustación escoyimos dos presentaciones: en carpaccio con un toquín al fornu y unes pingarates de vinagre de Módena que facía destacar l’arume y la testura del productu , y el más clásicu en rodaxa a la chapa, con un marcáu col que conseguía caltener tol xugu, y acompangao una guarnición de puré de patata y verdures.
Raciones curioses y bien presentaes, acompangaes por sidre Foncueva de 2018, col nivel que-y ye propiu a esti llagar, servío a la temperatura afayaízo, en tiempu y forma, por Ángel de Con, lo que permitió sacar lo meyor d’esta sidre y de la esperiencia gastronómica.
L’ambiente, el tratu y l’atención fixeron la esperiencia más prestosa si ye posible, y permítemos encamentar esta sidrería de toes toes, quedando con ganes de prebar l’amplia ufierta gastronómica d’esti restorán de bien merecía sonadía.
La Ría del Campanu, Sidrería Rest. M. Caso de la Villa, 44. Ribeseya T. 984 84 32 09
