Más de 10.700 mil presones asistieron a esti alcuentru de referencia de la cultura sidrera asturiana, qu’amás cuntó con una gran ufierta cultural pa neños y adultos.
LA SIDRA.- La Primera Sidre L’Añu –PSLA– consolidóse como un alcuentru de referencia de la cultura sidrera asturiana. Nesta VII edición, más de 10.700 presones asistieron al Muséu del Pueblu d’Asturies pa esfrutar y formar parte d’una de les tradiciones de la nuesa tierra que, como pasó con munches otres, tuvo en riesgu de perdese: les espiches de Selmana Santa.
La PSLA apostó fuertemente pola so recuperanza y afortunadamente ca añu participen más llagares y llega a más presones. La PSLA tuvo llugar del 24 al 27 de marzu y n’horariu de 12:00 a 22:00 hores, sacante’l domingu, una y bones la clausura foi a los cinco de la tarde.
El xueves 24 de marzu llevóse a cabu la inauguración al cargu de trabayadores de Xixón Fabril, empresa hestórica productora de botelles y anguañu menaciada de zarru. Tamién se cuntó cola presencia de Jesús Martínez, conceyal de Turismu y Festexos de Xixón; Alfonso Prado, propietariu del llagar La Morena ganaora de la Meyor Primer Sidre L’Añu 2016–; y miembros de les distintes confraderíes gastronómiques asturianes.
Y asina dio empiezu esta fiesta que xunció cultura, tradición y gastronomía. Por namás 5 euros les presones qu’asistieron pudieron tastiar tola sidre nuevo que quinxeron de más de 70 llagares. Por supustu, tamién hebio sidre dulce y ensin alcol pa que toos pudieren esfrutar al másimu. Amás cuntóse con una importante representación de les sidres premiaes nel Salón Internacional de les Sidres de Gala 2015; lo mesmo que de una interesante seleición de sidres internacionales.
Al otru díi, el vienres 25, los asistentes a la PSLA pudieron acoyer a los integrantes del penitente percorríu del Sidracrucis. Llegaron escontra les 15:30 dempués de pelegrinar por un bon númberu de chigres xixoneses pa reponer fuerces con una fabaona xabaz, y poder siguir col so sacrificáu camín escontra’l Muséu de la Sidre en Nava y a dellos llagares.
Ye importante siñalar qu’esti añu na PSLA los más piqueños tuvieron entá más actividaes pa divertise. Por exemplu, ellos mesmos mayaron mazana pa esperimentar de primera man ún de los pasos esenciales pa la ellaboración de sidre. Coles mesmes realizáronse costantemente actividaes comu talleres de cocina, corchar sidre a mazu, participar en xuegos comu la xaronca, la llave o’l tiru de boína; o concursar en distintes prebes, ente elles, certame de piqueños echaores.
Comu n’años anteriores llevar a cabu l’amuesa de tonada na que quedó demostrao que l’asturianada ta bien viva y que tien relevu xeneracional, una y bones los cantantes fueron tamién neños y adolescentes. Les escueles que participaron el vienres y el sábadu a les 17:00 hores fueron: Escuela de Música Tradicional Manolo Quirós al cargu d’Anabel Santiago (Uviéu), Escuela de Música Tradicional La Quintana col profesor Ismael Tomás (Xixón); y Escuela Casa La Cultura de Colunga al cargu de Lorena Corripio.
Pa los adultos tamién se proyeutaron actividaes empobinaes a amosar y dar puxu a la cultura sidrera comu’l V Concursu de Sidre Caseru fecho en maera. Esti foi un certame bien reñíu nel que’l xuráu tuvo que faer delles tasties pa poder escoyer a los trés ganadores: Luis Álvarez Núñez, de Mieres del Camín; Falo Nosti, de Garbelles en Xixón; y Mario Curto y Enol Alonso, de Cecea; Nava. Primer, segundu y terceros, respeutivamente. Tamién hebio tastes de sidre guiaes por Manuel G. Bustu y Donato Xuaquín Villoria; cocina en direutu y harmonizaze con sidre por Estefanía Ferreras, visites empuestes al Muséu del Pueblu d’Asturies o lleiciones d’echáu de sidre.
Asina demientres les cuatro xornaes que duró la PSLA, eventu entamáu pola revista LA SIDRA y Fundación Asturies XXI, empecipióse la temporada sidrera asturiana, siendo yá un alcuentru de referencia onde cultura, ociu, tradición y gastronomía van de la man. Nelli, recuperóse por sétimu añu la tradición de les espiches de Selmana Santa y del consumu de la sidre nuevo ensin trasegar. L’acoyía d’asturianos y turistes foi estupenda, un fechu que sigún los organizaores “afala a siguir trabayando”.
