Al Restaurante Leitariegos aportamos xusto enantes que al puertu del mesmu nome, nel caberu pueblu asturianu.
Ye un edificiu de maera, vidriu y pizarra, perbien integráu nel maraviosu paisaxe que lu arrodia, nel qu’esfrutar de les vistes sintiendo la música sele asturiana que lu ambienta.
Ellí, mientres nos echaben unes botelles de Sidra Trabanco, esfrutamos d’un escelente pote de berces, con compangu de calidá n’harmonía de proporciones y nel so puntu de cocción xustu.
Pero el platu que mos dexó de verdá con ganes de volver foi la llingua de vaca guisao en reducción de vinu de Cangas, una receta que lleva 20 hores a fueu llentu de preparación coles que se consigue una melosidá impresionante ya una testura que se desfai na boca; acompangada afayaízamente con encurtíos, que dan al platu el contraste de saborgu necesariu y una ensalada mista qu’apurrió’l frescor al conxuntu.
Merez la pena mencionar el pan, de fogaza y como recién fecho, y la tarta de quesu azul que -tovía bien acompangá cola sidre del de Llavandera- punxo’l ramu a tan encamentable llacuada.
RESTAURANTE LEITARIEGOS – Puertu L.leitariegos. Cangas del Narcea. T. 985 05 62 01
Pa recibir el PDF de la revista fai falta tar dáu/da d’alta nel whatsapp de LA SIDRA. ¡GRATIS!
