Un añu más el Festival Intercélticu d’An Oriant cumple espeutatives…pa casi toos.
Naide pue quexase esti añu de la programación musical, los “insultantemente mozos” artistes emerxentes que toquen de baldre pela cai Bretagne. Tampocu el tiempu deceiciona, fexo sol, la lluvia respetó…
Pero la xente nota que’l cambiu de formatu del festival con respeutu a otros años implica amenorgar la ufierta gastronómica y cultural en ciertu sentíu.
Yera precisamente la propia revista del festival, el Festicelte, la que güei quexábase per escritu de delles coses que s’echen en falta.
Falen d’una “deceición xeneralizao” por mor de que “un ciertu númberu de cocines de los países celtes y, ente elles, la yá bien famosa Cornish Pasty, nun van tar presentes nos espacios del festival intercelta de 2024”. Amás de la pasty cornuallesa faise notar l’ausencia del pulpu gallegu, el quesu galés, la confitería manesa y obviamente la sidra asturiano, ausencia que mos pesa a toos y danos la impresión de que nun ye’l nuesu festival de siempres.
Parafrasiando a la revista’l festival, “les cocines llocales son parte bultable de la identidá y de les cultures de les naciones acoyíes en Lorient. Cuandu s’anunciare la noticia de l’ausencia de toes estes delicies, ñaturalmente espardióse la incomprensión ente los asistentes al festival y los voluntarios, qu’asperaben provecíos poder volveles a esfrutar. Inclusive un festival tan guapu comu’l nuesu tien marxe de meyora.”
Pa rematar el picoteru artículu, ufiertaben la figura d’una pasty cornuallesa pa xugar al pinta y collorea, a la espera de que torne la de verdá.
Per parte los asturianos asperamos con enfotu que l’ausencia de sidra y gastronomía asturiana de cara al públicu seya una puntual esceición y tornemos a la nuesa sidrera normalidá pa la viniente edición de 2025.
