Aprebada una proposición non de llei pa la so siñalización y presentada otra más pa la so reactivación.
LA SIDRA.- Paez qu’el Muséu de la Sidre escomienza a dar los primeros pasos pa la so revitalización. A finales de payares la diputada Paula Valero acompañó’l llunes al conceyal de Agora Nava, Luis Catalán, a la Conseyería d’Emplegu, Industria y Turismu p’apurrir un paquete de 500 firmes que se recoyeron per toa Asturies col enfotu de solicitar l’allugamientu na Autovía A-64 de siñales indicatives del Muséu de la Sidra de Nava. Darréu, nos primeros díis d’avientu, la Xunta Xeneral del Principáu de Asturies aprobó una proposición non de llei presentada pol Partíu Popular pa que l’equipamientu se siñaliza na carretera nacional 634.
Agora, ye la mesma organización política la que tornó a rializar una propuesta rellativa al cientru. Nella persíguese la reactivación del Muséu de la Sidre y solicítase un cambéu de modelu, amás d’una mayor implicación per parte del Principáu. El voceru de Turismu y Cultura del PP na Xunta, Pedro de Rueda, desplicó qu’esti tien de trescender del ámbitu de conceyu, una y bones queda patente que l’equipamientu nun furrula coles actuales aportaciones que realicen los conceyos. Tamién señala que resulta malo d’atalantar que’l muséu nun reciba aportaciones de la Conseyería de Turismu.
Tantu De Rueda como’l voceru alxuntu y d’Agroganadería, Pesca y Función Pública, Luis Venta Cueli, apocayá rializaron una visita a les istalaciones del cientru. Venta Cueli yá manifestara la so esmolición pol muséu en declaraciones a esti mediu de comunicación cuando se-y entrugó la so opinión sobro’l procesu pa que la cultura sidrera seya reconocía como Padrimoniu Cultural Inmaterial de la Humanidá: “Nun hai un apueste per parte del gobiernu asturianu pa defender la cultura sidrera. Por poner un exemplu, el Muséu de la Sidre, que tendría de ser un referente, vemos que se ta dexando morrer. Y eso nun facilita de denguna manera l’impulsu que precisa esta candidatura” dixo pa La SIDRA.
