El motivu ye da-y puxu a la cultura sidrera y recaldar fondos pal Festival Intercélticu d’Ocidente qu’esti añu cellebra la so ventiava edición.
LA SIDRA.- Tapia va cellebrar los díis 30 abril y 1 de mayu la so primer fiesta de la sidre. La folixa va escomenzar a les 12:00 hores y va allugase na Plaza del Conceyu. Podrán tastiase sidres de los llagares asturianos de Solleiro, Trabanco, Arbesú, Muñiz y Zythos. Tamién va haber música’l país y comida tradicional comu bollos preñaos, o raciones de rapón.
Esti alcuentru ta entamáu pela Banda de Gaitas D’Occidente en collaboración col Conceyu de Tapia. El motivu ye recaldar fondos pal Festival Intercélticu d’Ocidente de Tapia de Casariego que se va llevar a cabu’l prósimu mes d’agostu y qu’esti añu cumple la so ventiava edición. Cabo mentar que dichu festival ye una de les cites más importantes del folclor a nivel internacional y foi declaráu como Eventu d’Interés Turísticu Rexonal.
“Queremos qu’hebia más cultura de sidre equí en Tapia. Gústamos la cultura asturiana de la sidre y buscamos da-y puxu” sopelexó pa esta revista Martín Fernández Cascudo, direutor de la Banda de Gaitas d’Ocidente. El músicu tamién desplicó que ye “un arguyu” cumplir vente años rializando’l festival: “Siguimos cuasique tolos que lo entamemos, y munchos de nós yá somos pas, y los nuesos nenos van tamién formando parte d’elli. Amás de que ye un eventu importante en Tapia”. Y ye que, siñala Fernández, l’Intercélticu non solo ye un referente cultural del país, tamién xenera un movimientu económicu importante.
