Tratar de la primer hora que recueye tola llexislación vixente sobro mazana y sidre
LA SIDRA.- Nel edificiu hestóricu d’El Gaitero, en Villaviciosa presentábase ayeri’l llamáu “Códigu de la Sidre”, la primer obra que recueye la llexislación vixente referente a la produición de mazana y el so postrer tresformamientu pa la ellaboración de la sidre. El documentu, en papel y en formatu dixital, va empobináu a toos aquellos axentes arreyaos nel seutor asina como a los llagareros, a lps operaores xurídicos y ciudadanos en xeneral. El códigu articúlase alrodiu a cuatro ellementos básicos: el productu, los empresarios, la ellaboración y comercialización de la sidre y la calidá.
Al actu de presentación asistieron la Dellegada del Gobiernu n’Asturies, Delia Llosa; la conseyera de Desendolcu Rural y Recursos Naturales, María Jesús Álvarez; el Direutor de l’Axencia Estatal Boletín Oficial del Estáu, Manuel Tuero; el Presidente del CR DOP Sidre d’Asturies, Celestino Cortina; el Xerente del CR DOP Sidre d’Asturies, Daniel Ruiz; l’Alcalde de Villaviciosa, Alejandro Vega; y el Presidente de Valle Ballina y Fernández, Bernardo Cardín, ente más representantes y autoridaes asturianes.
El “Códigu de la sidre” trátase de la primer obra que se realiza nel Estáu español sobro la materia y presenta grandes ventayes: al arrexuntase nella la totalidá de lleis esistentes sobro la materia, terminando cola dispersión regulatoria esistente y dexando la organización de materiales xurídicos a los que de normal ye difícile aportar. D’esta miente, l’operador siempres va disponer de la llexislación vixente y costantemente actualizada. Amás, los interesaos van poder recibir na so casa una copia en papel del códigu, ensin costu, y que-yos dexará consultar la llexislación en cualisquier momentu.
“Cabe destacar que’l códigu presenta la escoyeta de la llexislación que vertebra la cadena alimentaria de la sidre, dende la produición de la mazana, fasta la ellaboración y presentación de la bébora. Esi ye’l so gran valor”, siñalen dende la DOP Sidre d’Asturies.
